تحدي بعمّان الأول - فريق الصويفية

26 November 2015

 

تحدي بعمّان الأول - فريق الصويفية

يوم الخميس الماضي انطلقنا بأول نسخة من "تحدي بعمّان" #beammanchallenge  ، وكانت الفكرة بسيطة جدا (المفروض!). فريقين يتألف كل منهم من إمرأتين ومع كل فريق عشرة دنانير أردنية، وبالعشرة دنانير المطلوب من كل فريق ياكل ويشرب ويشتري هديتين. بس وين القصة؟ واحد من الفرق رح ينزل عالبلد والتاني رح يروح عالصويفية ونقيس الفرق.

 

الفريقين كانوا: لينا وهيب وعلا فراواتي من جهة ورغدة بطرس وربى الناظر من جهة أخرى. المقلب كان انه فريقنا انا ورغدة هو الفريق اللي راح الصويفية، وما أدراك ما الصويفية! المهم... بدا التحدي ولينا وعلا راحو مشي عالبلد من مكتب همزة وصل بشارع الرينبو وطبعا نحنا كان لازم ناخد مواصلات... والمهم سرفيس وصرنا عموقف الباص على الدوار الثالث. موقف الباص بده مقال لحاله، بس لازم أتساءل هون إنه مين اللى قال للجهة المنفذة لمواقف الباصات انه هدول كراسي إنتظار مريحة؟ ومين المسؤول انه ما في ولا ورقة بتخبر عن مواعيد الباص؟ نحنا شعب بيفتح بالمندل شكله؟ للأسف كل ما مشيت بشوارع المدينة بتأكد أكثر إنه مدينتنا مش ملائمة لا لكبار السن ولالذوي الإحتياجات الخاصة, وهادا شيء سيّء لأانه هالشعب الشاب –متل ما بنضل نتفاخر ونتباهى- آخرته يكبر وموقف باص مريح بعده ما عنّا!

ما علينا... وصلنا الصويفية وكان صار رايح من العشر دنانير دينار ونص مواصلات (ول!)، طبعا الفريق الثاني بهاي الأثناء كان شاري ومتشرّي سنسال وبزر ومخلل! قررنا نشتري الهدايا ودخلنا عمكتبة الماجد في أول الصويفية من فوق واشترينا نظارات بتضوي وبتطفي وعلبة بتطلّع فقاعات صابون كبييييييرة وهادول كان مجموعهم دينارين.

بعدها قررنا نعمل حسبة، 1.5 مواصلات روحة و1.5 مواصلات رجعة و2 هدايا، هيك طارو أول خمس دنانير. وبدينا نجوع... فقررنا نقطع الصويفية لتحت ونشوف إذا ممكن ناكل ونشرب إشي ب 5 دنانير، طبعا التفكير المنطقي بيقول "شاورما، فلافل بيمشي الحال!" ولكن لا وألف لا! إذا الجماعة في البلد متسليين فنحنا كمان لازم نتسلى وما نختار الطريق السهل، فشفنا أكتر من مكان وسألنا في كتير مطاعم وما لقينا أي شيء ممكن يساعدنا. إشترينا قنينة مي صغيرة ب 20 قرش، وبربع دينار فستق حلو كنت ناسية إنه موجود بالدنيا!BeAmman Challenge - Sweifieh

وصلنا بالآخر للبناني سناك في شارع الوكالات، معقول سندويشة الصاج حقها 2.25 دينار؟ ليش؟ المهم خرجنا من لبناني سناك نجر أذيال الخيبة والجوع، وقررنا نفوت عند كلاّج عمر (ما رح أعملهم دعاية كتير لأنه متل ما خبّرنا الشب التصوير ممنوع وهم مش بحاجة لدعاية وكان فوق كل هادا جفص!) بس متل ما بيقول زياد الرحباني "أنا مش كافر بس الجوع كافر" إشترينا وحدة كلاّج بجبنة... وإكتشفنا جنب المحل اللي ما رح أحكي إسمه كمان مرّة مكان إسمه "عالم الرماية" بيعطيك 30 طلقة بدينار، فقررنا نتخلى عن دينار ونلعب. لمى قدومي كانت معنا في هاي المرحلة، وبحب أنوّه إنه هي في عندها إحتراف لدرجة إني قلقت وقررت عمري ما أختلف معها!

المهم، بعد كل هادا صفي معنا 2.5 دينار... وبدأت رحلة العذاب الحقيقية وخصوصا لما عرفنا إنه جماعة البلد قاعدين بدهم يتغدوا صينية لحمة راس عصفور! أظن هاي كانت الضربة القاضية لمعنوياتنا... ضلينا نلف ونمشي لدرجة إنه صاحب أحد المطاعم إستغرب وسألنا شو مالنا ولما قلناله إنه لازم نتغدى وما معنى إلا دينارين ونص كان بده يطعمينا ببلاش!

قررنا بالآخر نستسلم ونروح ناكل شاورما أو صفيحة أو مناقيش، ولكن في نصف الطريق وجدنا مكان مهجور شكله جديد ونظيف، إسمه Feel Burger  موجود خلف مبنى الضريبة –يا ساتر- وعنده برغر ب 1.25 دينار، يعني بنطلع راس بطاقية. الشب الموجود مؤدب، المكان نظيف، لسه نفسي ببطاطا مقلية بس يومها كانت العين بصيرة والإيد قصيرة!

أكلنا وطلعنا عشان لمى عزمتنا عقهوة في مكان آخر، 2 قهوة كلّفوا 5 دنانير! وبعدها أخدنا تكسي ورجعنا عالرينبو بالدينار ونص اللي حاطينهم عجنب للترويحة، وعأول الرينبو خلصوا وخلينا العمو سوّاق التكسي اللي عنده آراء سياسية مميزة كتير ينزلنا وكملناها مشي لنلتقي بالفريق التاني اللي كان ماكل وشارب نص البلد بالعشر دنانير!

كل أسبوع تحدي جديد! بتحبوا تشاركوا؟
 

* تجربة فريق وسط البلد هنا

BeAmman Challenge - SweifiehBeAmman Challenge - Sweifieh